પાકિસ્તાનનું ડિફોલ્ટર થવાનું જોખમ વધ્યું

– CPEC પ્રોજેક્ટ પણ અટકી રહ્યો છે

પાડોશી દેશ પાકિસ્તાન મોટા આર્થિક સંકટમાં ફસાઈ જવાનો ભય વધી ગયો છે. રાજકીય કટોકટી અને ઇન્ટરનેશનલ મોનેટરી ફંડ (IMF) સાથે લોન વાટાઘાટો અંગેની અનિશ્ચિતતાએ તેની લોનની ચુકવણીમાં ડિફોલ્ટ થવાનું જોખમ વધાર્યું છે. બીજી તરફ, બહુચર્ચિત CPEC પ્રોજેક્ટ પણ અટકી ગયો હોય તેવું લાગી રહ્યું છે.

એક અહેવાલ મુજબ, દેશ ડિફોલ્ટર બનવાનું જોખમ ઘણું વધી ગયું છે. દેશના ડિફોલ્ટર બનવાના જોખમને પાંચ વર્ષના ક્રેડિટ-ડિફોલ્ટ સ્વેપ (CDS) દ્વારા માપવામાં આવે છે. સીડીએસ એ એક પ્રકારનો વીમા કરાર છે જે રોકાણકારને દેશના ડિફોલ્ટના કિસ્સામાં નાણાકીય સુરક્ષા પ્રદાન કરે છે.

બુધવારે પાકિસ્તાનની CDS વધીને 75.5 ટકા થઈ ગઈ છે. અગાઉ તે 56.2 ટકા હતો. આર્થિક સંશોધન ફર્મના જણાવ્યા અનુસાર, CDSમાં વધારો ગંભીર સ્થિતિનો સંકેત આપી રહ્યો છે. સીડીએસમાં વધારો થવાને કારણે પાકિસ્તાન સરકાર માટે બોન્ડ અથવા કોમર્શિયલ બોરોઇંગ દ્વારા બજારોમાંથી વિદેશી હૂંડિયામણ એકત્ર કરવું અત્યંત મુશ્કેલ બનશે.

પાકિસ્તાનને 34 અબજ ડોલરની જરૂર છે

પાકિસ્તાનને તેની વિદેશી દેવાની જવાબદારી પૂરી કરવા માટે વર્તમાન નાણાકીય વર્ષમાં 32 થી 34 અબજ ડોલરની જરૂર છે. નાણાકીય નિષ્ણાતોના મતે, બાકીના નાણાકીય વર્ષમાં પાકિસ્તાનને લગભગ 23 અબજ ડોલરની જરૂર છે. આ માટે પાકિસ્તાન IMF પાસેથી લોન લેવા માટે સતત પ્રયાસ કરી રહ્યું છે.

પાકિસ્તાને IMFને તેની રેવન્યુ ડેફિસિટને 1500 અબજ સુધી ઘટાડવાનું વચન આપ્યું છે, પરંતુ તે આમ કરી શકશે તેવું લાગતું નથી. દરમિયાન, મોનેટરી ફંડે પાકિસ્તાન સાથે નવેમ્બરના પ્રથમ સપ્તાહમાં થનારી મંત્રણાને ત્રીજા સપ્તાહ સુધી સ્થગિત કરી દીધી છે. પાકિસ્તાને IMFને અગાઉ આપેલા વચનો પૂરા કરવા પડશે. જેમાં પેટ્રોલ પર ટેક્સ વધારવાના વચનનો સમાવેશ થાય છે.

ઈકોનોમિક કોરિડોર પ્રોજેક્ટને લઈને આશંકા વધી ગઈ છે

બીજી તરફ ચીન પાકિસ્તાન ઈકોનોમિક કોરિડોર (CPEC) પ્રોજેક્ટના અમલીકરણને લઈને આશંકાઓ વધી રહી છે. તે અપેક્ષિત ગતિએ આગળ વધી રહ્યું નથી.સિંગાપોર પોસ્ટના એક અહેવાલ મુજબ, ચીનને પાકિસ્તાનમાં પૂરો વિશ્વાસ નથી, જ્યારે ઈસ્લામાબાદ તેને પોતાનો ઓલ-વેધર મિત્ર ગણાવે છે. પ્રોજેક્ટ્સના એન્જિનિયરો પર થયેલા હુમલાએ પાકિસ્તાનમાં ચીનનો વિશ્વાસ પણ ડગમગ્યો છે.

જો કે હવે પાકિસ્તાને ચીની નાગરિકોને બુલેટ પ્રુફ કાર આપી છે. CPEC પ્રોજેક્ટ પાકિસ્તાન માટે ખૂબ જ મહત્વપૂર્ણ છે કારણ કે તે તેને વીજળી ઉત્પન્ન કરવામાં મદદ કરશે અને વર્તમાન 16 કલાક દૈનિક વીજ કાપમાંથી રાહત મેળવશે.