બોરિસ જોનસનનું ગાંધી આશ્રમમાં મંત્રોચ્ચાર સાથે સ્વાગત

– ગાંધીજીની પ્રતિમાને સુતરની આંટી પહેરાવી

– ગુજરાતના મહેમાન બન્યા યુકેના PM

– આશ્રમ રોડ સ્થિત હોટલ હયાત રિજન્સીમાં રોકાશે યુકેના PM

બ્રિટનના PM બોરિસ જોનસન આજે ગુજરાત પ્રવાસે છે. તેઓ અમદાવાદ પહોંચી ગયા છે, જ્યાં એરપોર્ટ બહાર તેમનું ઢોલ-નગારાં અને ગુજરાતની ઝાંખી સાથે સ્વાગત કરાયું હતું. રાજ્યપાલ આચાર્ય દેવવ્રતે પણ એરપોર્ટ પહોંચી તેમનું સ્વાગત કર્યું હતું. એરપોર્ટથી તેઓ આશ્રમ રોડ સ્થિત હોટલ હયાત રિજન્સી ગયા હતા. આ બાદ તેઓ ગાંધી આશ્રમની પણ મુલાકાતે પહોંચ્યા છે. આ પહેલા બ્રિટિશ PMનો એરપોર્ટથી ગાંધી આશ્રમ સુધી રોડ શો યોજાયો હતો. યુકેના PMનું અભિવાદન કરવા સુભાષબ્રિજ કલેકટર ઓફિસ ખાતે મોટી સંખ્યામાં લોકો પહોંચ્યા હતા.

• બોરિસ જોનસને ગાંધીજીની પ્રતિમાને સુતરની આંટી પહેરાવી
• બ્રિટિશ પીએમ ગાંધી આશ્રમ પહોંચ્યા, મંત્રોચ્ચાર સાથે તેમનું સ્વાગત કરાયું.
• મુખ્યમંત્રી ભૂપેન્દ્ર પટેલ ગાંધી આશ્રમ પહોંચ્યા.
• બોરિસ જોનસન હોટલ હયાત રિજન્સી પહોંચ્યા.
• એરપોર્ટથી ગાંધી આશ્રમ સુધી 15 મિનિટનો રોડ શો યોજાયો.

યુકેના PMના સ્વાગત માટે એરપોર્ટથી ગાંધી આશ્રમ સુધીના રસ્તા પર સ્વાગત માટેનાં સ્ટેજ તૈયાર કરાયાં હતાં. ઉપરાંત સમગ્ર રૂટ પર વેલકમ ગુજરાતના હોર્ડિંગ્સ પણ લગાવવામાં આવ્યા છે. ગુજસેલ બહારથી ગાંધી આશ્રમ સુધી લોકો સ્વાગત માટે એક હાથમાં ભારત અને બીજા હાથમાં યુકેનો ધ્વજ લઈને પહોંચ્યા હતા. અમદાવાદ એરપોર્ટ પર બોરિસ જોનસનનું રાજ્યપાલ આચાર્ય દેવવ્રત અને મુખ્યમંત્રી ભૂપેન્દ્ર પટેલે પુષ્પગુચ્છ આપી સ્વાગત કર્યું હતું. આ સમયે મંત્રી જગદીશ વિશ્વકર્મા, અમદાવાદના મેયર કિરીટ પરમાર સહિતના નેતાઓ તથા અન્ય ઉચ્ચ અધિકારીઓ ઉપસ્થિત રહ્યા હતા.

ગુજરાત બાયોટેકનોલોજીની મુલાકાત લેશે યુકેના PM
બ્રિટનના વડાપ્રધાન બોરિસ જોનસન તેમની ભારત મુલાકાતના કાર્યક્રમના ભાગરૂપે નિર્માણાધીન બીજીયુની મુલાકાત લેશે. ગુજરાત સરકારના ફ્લેગશિપ પ્રોજેક્ટ એવી ‘ગુજરાત બાયોટેકનોલોજી યુનિવર્સિટી’ આશરે રૂ.200 કરોડના ખર્ચે પ્રતિષ્ઠિત ગિફ્ટ-સિટી ખાતે આકાર લઇ રહી છે, જેમાં ઉત્પાદનોની નાવીન્યસભર વિચારને કેન્દ્રસ્થાને રાખીને દેશના યુવા માનસ સંશોધન કાર્યો કરશે.

તેમની મુલાકાત શિક્ષણ, આરોગ્ય, ટેકનોલોજીમાં સહયોગ પર કેન્દ્રિત
તેમની આ મુલાકાત બંને દેશ વચ્ચે શિક્ષણ, આરોગ્ય અને ટેક્નોલોજીમાં સહયોગ પર કેન્દ્રિત છે. બોરિસ જોનસન ગુજરાત બાયોટેકનોલોજી યુનિવર્સિટીમાં નિર્માણાધીન ઉચ્ચ સ્તરની સંશોધન સુવિધાઓની મુલાકાત લેશે અને જીબીયુ માટે સંશોધન વિદ્વાનો, લેબ ટેક્નિશિયન અને ફેકલ્ટી સભ્યો સાથે વાર્તાલાપ કરશે. તેમને યુનિવર્સિટીના હેતુ અને તેની કામગીરીના ક્ષેત્રો અંગે માહિતગાર કરવામાં આવશે. વડાપ્રધાન બોરિસ જોનસન સહયોગના નેજા હેઠળ સંશોધન અને નવીનતાના ભાવિ માર્ગો અંગે ચર્ચા કરશે.